آن لائن پاکستان ڈیجیٹل
Related Articles
اسلام آباد: صدر مملکت ڈاکٹر عارف علوی نے دو صوبوں میں نگران حکومتوں کے 90 دن سے زائد عرصے سے قیام کی قانونی حیثیت پر تشویش کا اظہار کرتے ہوئے اس حوالے سے چوہدری فواد حسین کا خط وزیر اعظم کو بھیج دیا۔
خط میں صدر مملکت نے وزیر اعظم سے ملک میں آئین کی بالادستی اور جمہوریت کا استحکام یقینی بنانے کیلئے سابق وفاقی وزیر کی جانب سے اٹھائے گئے مسائل پر غور کرنے کا کہا ہے۔ ایوان صدر کے پریس ونگ کے مطابق چوہدری فواد نے صدر کے نام اپنے خط میں ملک کے دو صوبوں میں عبوری سیٹ اپ کی قانونی حیثیت کے حوالے سے مسائل کی نشاندہی کرتے ہوئے کہا کہ پنجاب اور خیبرپختونخوا میں عبوری حکومتوں نے اپنی مقررہ مدت پوری کر لی ہے۔ آئین میں عبوری سیٹ اپ کی مقررہ مدت کو جاری رکھنے/توسیع کا کوئی ذکر نہیں ہے ۔
نگراں حکومتیں آئین کے آرٹیکل 224 کے مطابق الیکشن کمیشن کو آئین اور قانون کے مطابق آزادانہ، منصفانہ اور دیانتدارانہ انداز میں انتخابات کے انعقاد میں سہولت فراہم کرنے کے لیے متعارف کرائی گئیں۔ صدر مملکت ڈاکٹر عارف علوی نے اپنے خط میں وزیراعظم میاں محمد شہباز شریف سے کہا ہے کہ وہ پاکستان میں آئین کی بالادستی اور جمہوریت کی مضبوطی کو یقینی بنانے کے لیے اس معاملے کا جائزہ لیں۔
