آن لائن پاکستان ڈیجیٹل
Related Articles
پاکستان شاہینز نے دور آسٹریلیا میں اپنے پہلے ون ڈے کرکٹ میچ میں پاپوا نیوگنی کو 224 رنز سے شکست دے دی۔ ترجمان پی سی بی کے مطابق پاکستان شاہینز نے ٹاس جیت کر پہلے بیٹنگ کرتے ہوئے مقررہ 50 اوورز میں 8 وکٹوں پر 323 رنز بنائے جس میں اذان اویس اور عرفات منہاس کی نصف سنچریاں قابل ذکر تھیں ۔ جواب میں پاکستانی شاہینز کی عمدہ بائولنگ کے بدولت پاپوا نیوگنی کی ٹیم 22 اوورز میں صرف 99 رنز بناکر آئوٹ ہوگئی۔
فیصل اکرم نے عمدہ بائولنگ کرتے ہوئے 5وکٹیں حاصل کیں۔پاکستان شاہینز کے اوپنرز اذان اویس اور شامل حسین نے اپنی ٹیم کو86 رنز کا پراعتماد آغاز فراہم کیا ۔شامل حسین 7 چوکوں کی مدد سے 45رنز بناکر آئوٹ ہوگئے۔اذان اویس نے عمدہ بیٹنگ کرتے ہوئے 94 گیندوں پر 72 رنز کی اننگز کھیلی جس میں 6 چوکے شامل تھے۔انہوں نے وہاج ریاض کے ساتھ تیسری وکٹ کی شراکت میں 57 رنز کا اضافہ کیا۔
وہاج ریاض نے دو چوکوں اور ایک چھکے کی مدد سے36 رنز سکور کیے۔عرفان خان نے 4 چوکوں کی مدد سے41 رنز کی اننگز کھیلی جس کے بعد عرفات منہاس اور احمد خان کے درمیان 74 رنز کی ساتویں وکٹ کی شراکت نے پاکستان شاہینز کی پوزیشن مزید مستحکم کردی۔ عرفات منہاس نے 34گیندوں پر 7چوکوں اور ایک چھکے کی مدد سے56 رنز بنائے جبکہ احمد خان 31رنز بنانے میں کامیاب رہے۔
پاپوا نیوگنی کی طرف سے چارلس امینی نے 3 وکٹیں حاصل کیں۔پاکستانی بائولرز نے پاپوا نیوگنی کے کسی بھی بلے باز کو قدم جمانے کا موقع نہیں دیا اور 22 اوورز میں صرف 99 رنز پر اس کی بساط لپیٹ دی۔پاپوا نیوگنی کی طرف سے اسداللہ والا 23 رنز کے ساتھ ٹاپ سکوررہے۔پاکستان شاہینز کی طرف سے فیصل اکرم نے عمدہ بولنگ کرتے ہوئے صرف17رنز کے عوض 5 وکٹیں حاصل کیں۔
احمد خان نے 3اور عامر حسن نے 2 کھلاڑیوں کو آئوٹ کیا۔اس سے قبل پاکستان شاہینز نے آسٹریلوی دورے میں 6ٹیموں کے ٹی ٹوئٹی ٹورنامنٹ کا فائنل کھیلا تھا ۔ پاکستان شاہینز کی ٹیم کل بدھ کو دورے کا دوسرا اور آخری ون ڈے میچ ناردن ٹیریٹری سٹرائیک کے خلاف کھیلے گی۔
